परवानीपुर गाउँपालिकाद्वारा ३६ करोड ६३ लाखको बजेट प्रस्तुत

८असार बारा । बाराको परवानी गाउँपालिकाले आगामी आर्थिक वर्ष २०८३÷०८४ का लागि ३६ करोड ६३ लाख १० हजार रुपैयाँ बराबरको अनुमानित बजेट ल्याएको छ ।सोमबार आयोजित परवानीपुर गाउँपालिकाको १८औँ गाउँसभाको अधिवेशनमा गाउँपालिकाकी उपाध्यक्ष सुगान्धी देवी कनुइनले आगामी आर्थिक वर्षको बजेट सार्वजनिक गरेकी हुन् ।

त्यसअघि गाउँपालिकाका प्रमुख प्रशासकीय अधिकृत मुन्ना साह रौनियारले आगामी आर्थिक वर्षका लागि नीति तथा कार्यक्रम प्रस्तूत गरेका थिए । जसमा शिक्षा, पूर्वाधार विकास,सरसफाइ, आर्थिक विकास तथा प्रभावकारी सेवा प्रवाहलाई प्रमुख प्राथमिकतामा राखिएको छ।

नीति तथा कार्यक्रममा गाउँपालिकाभित्र अधुरा रहेका विद्यालय भवन निर्माण कार्य सम्पन्न गरिने,कर सेवा गाउँपालिकाबाटै उपलब्ध गराउने, भूमि प्रशासनसम्बन्धी सेवा स्थानीय तहबाट प्रवाह गर्ने तथा वडा नम्बर १ मा नदी नियन्त्रणको काम सम्पन्न गर्ने उल्लेख छ ।

गाउँसभालाई सम्बोधन गर्दै गाउँपालिकाका अध्यक्ष रामक्षत्री प्रसाद कुर्मीले गाउँपालिकाले ल्याएको नीति तथा कार्यक्रमको सफल कार्यान्वयनका लागि जनप्रतिनिधि, कर्मचारी, राजनीतिक दल, नागरिक समाज तथा स्थानीयवासीबीच आपसी सहकार्य अपरिहार्य रहेको बताए। उनले गाउँपालिकाको समग्र विकास, सुशासन तथा नागरिकलाई सहज र गुणस्तरीय सेवा प्रवाहलाई केन्द्रमा राखेर बजेट तथा कार्यक्रम ल्याइएको उल्लेख गरे।

कुर्मीकै अध्यक्षतामा सम्पन्न गाउँसभामा वडाध्यक्षहरु, कार्यपामलिका सदस्यहरु, वडा सदस्यहरु , कर्मचारी, नेकपा एमालेका नेता उमेश गुप्ता लगायतकाकोपनि सहभागिता थियो ।