मेरो भूतसँग भेट्यो भने ?

के गर्ला 

यदि मेरो वर्तमानले 

मेरो भूतसँग भेट्यो भने ?

पिडामा तड्पिरहेको बेला,

नआत्तिए केही क्षणमा 

आनन्द पनि आउँछ भन्ला ?

या 

खुसीमा मात्तिएको बेला, 

धेरै नफुर्की भनी

त्यसपछि आउने दुःखबारे सावधान गराउला ?

झिनो उल्झनले दिनरात सताउँदा 

सुल्झन भेटेसि फिस्स हास्नेछेस् भन्ला ? 

या

सानो कुरामा बडो घमन्ड गर्दा, 

पछुताउनु छ भनी चिन्तित होला ?

अपनत्व बढ्दै जाँदा 

त्यो त केवल क्षणिक हो भनी बुझाउला ?

या 

घृणा छ जो सँग

उही एक दिन प्यारो हुनेछ भनी जानकारी गराउँला ?

सङ्घर्ष गर्दै जाँदा 

कतिऔं पटकमा सफलता मिल्नेछ भनी बताउला 

या 

भाग्यको भर पर्दा

थोरै उपलब्धि पछि फेरि शून्य मै पुग्ने बाटो हिँडाउला ?

भेट्दा कसैसँग,

यो नै अन्तिम भेट हुनेछ भनी थाहा देला ?

या 

तर्किदा कोहीसँग

बार बार एउटै बाटो पर्नु छ भनी गिज्याउला ?