स्ववियु निर्वाचन : ठाकुरराममा शान्तिपूर्ण तरिकाले सम्पन्न, खस्यो ४० प्रतिशत मत

६ चैत,वीरगन्ज

वीरगन्जको ठाकुरराम बहुमुखी क्याम्पसमा १६ बर्षपछि भएको स्ववियु निर्वाचनमा ४० प्रतिशत मात्रै मत खसेको  छ।

ठाकुरराम क्याम्पसमा यसअघि २०६३ सालमा स्ववियु निर्वाचन भएको थियो। उक्त निर्वाचनबाट निर्वाचित स्ववियु पदाधिकारी र सदस्यको कार्यकाल २०६५ सालमा सकिएको थियो । त्यस पछी  यता ठाकुरराम क्याम्पसमाभने स्ववियु निर्वाचन नै हुन सकेको थिएन।
मंगलबार बिहान १० देखि साँझ ५:३० बजेसम्म भएको मतदानमा कुल १० हजार ७२९ मतमध्ये ४० प्रतिशत अर्थात ४ हजार २९९ मत खसेको प्रमुख निर्वाचन अधिकृत दिलिप सिंहले जानकारी दिए।

मंगलबार बिहान ८ बजेदेखि नै मतदान सुरु हुने भनिएतापनि तयारी पूरा नभएका कारण बिहान १० बजेदेखि मात्रै मतदान सुरु भएको थियो।
ठाकुरराम क्याम्पसमा स्ववियु सभापति पदका लागि विभिन्न दल निकट र स्वतन्त्र समूहबाट गरि १४ जना चुनावी प्रतिस्पर्धामा छन्।प्रत्यक्षतर्फ सभापति,सचिव र कोषाध्यक्ष र ११ सदस्य तथा समानुपातिकतर्फ १० सदस्य गरि कूल २१ पदका लागि २४७ जनाको उम्मेदवारी परेको थियो।

निर्वाचनको अवलोकन र सुरक्षाका लागि पर्साका प्रमुख जिल्ला अधिकारी (सिडिओ) र जिल्ला प्रहरी कार्यालय पर्साका प्रहरी उपरीक्षक (एसपी) गौतम मिश्रसहित प्रशासन र सुरक्षा निकायका अधिकारीहरू क्याम्पसमा उपस्थित थिए ।

निर्वाचनमा सञ्चारकर्मीहरूमाथि भने पटक-पटक दुर्व्यवहार भएको गुनासो सुनियो । सुरुमा सञ्चारकर्मीहरूलाई प्रवेशमा रोक लगाइएको थियो । पछि प्रवेश गर्न दिइए पनि प्रहरीले केही समयमै उनीहरूलाई बाहिर निकालेको थियो । घटनाले सञ्चार क्षेत्रमा असन्तुष्टि पैदा गरेको छ ।

निर्वाचनले लामो समयदेखि रोकिएको ठाकुरराम क्याम्पसको विद्यार्थी नेतृत्व चयन प्रक्रियालाई पुनर्जनन दिएको छ । मतगणनाको नतिजाले नयाँ नेतृत्वलाई स्वागत गर्ने बाटो खोल्नेछ ।